پاکستان اور ترکیہ کے تعلقات میں نئی پیش رفت، نجکاری اور توانائی کے شعبوں میں تعاون بڑھانے پر اتفاق
اسلام آباد (اسٹاف رپورٹر):
وزیراعظم کے مشیر برائے نجکاری محمد علی نے ترکیہ کے دارالحکومت انقرہ میں ترکیہ کے وزیر برائے توانائی و قدرتی وسائل سے تفصیلی ملاقات کی، جس میں دونوں ممالک کے درمیان اقتصادی تعاون، سرمایہ کاری کے فروغ اور توانائی کے شعبے میں دوطرفہ روابط کو مزید مضبوط بنانے پر تبادلۂ خیال کیا گیا۔
ملاقات کے دوران پاکستان اور ترکیہ کے درمیان اسٹریٹجک شراکت داری کو مزید وسعت دینے، نجی شعبے کے باہمی تعاون کو فروغ دینے اور سرمایہ کاری کے نئے مواقع پیدا کرنے پر بھی گفتگو کی گئی۔ دونوں رہنماؤں نے توانائی کے شعبے میں اصلاحات، جدید ٹیکنالوجی اور ترقیاتی تجربات سے استفادہ کرنے کی اہمیت پر زور دیا۔
مشیرِ نجکاری محمد علی نے پاکستان میں سرمایہ کاری کے مواقع، معاشی اصلاحات اور نجکاری کے عمل سے متعلق حکومتی اقدامات سے بھی آگاہ کیا۔ اس موقع پر توانائی کے شعبے میں مشترکہ منصوبوں، ادارہ جاتی تعاون اور تجربات کے تبادلے کے امکانات کا جائزہ لیا گیا۔
دونوں جانب سے اس عزم کا اعادہ کیا گیا کہ پاکستان اور ترکیہ کے درمیان اقتصادی، تجارتی اور ادارہ جاتی تعاون کو مزید گہرا کیا جائے گا تاکہ باہمی مفادات کے حصول اور علاقائی ترقی کے اہداف کو آگے بڑھایا جا سکے۔
سیاسی و اقتصادی حلقوں کے مطابق پاکستان اور ترکیہ کے درمیان بڑھتا ہوا تعاون نہ صرف دوطرفہ تعلقات کو مزید مستحکم کرے گا بلکہ سرمایہ کاری اور توانائی کے شعبوں میں نئی راہیں بھی ہموار کرے گا۔
کیا ترکیہ کے ساتھ بڑھتا ہوا تعاون پاکستان کی معیشت کے لیے فائدہ مند ثابت ہوگا؟اپنی رائے کمنٹس میں ضرور بتائیں۔
