افواج پاکستان نے قوم کا سر فخر سے بلند کر دیا، ندیم افضل چن
اسلام آباد (سٹاف رپورٹر) مرکزی سیکرٹری اطلاعات ندیم افضل چن نے کہا ہے کہ افواج پاکستان نے قوم کا سر فخر سے بلند کر دیا، دشمن کو منہ توڑ جواب دیا گیا، ندیم افضل چن نے آپریشن بُنْيَانٌ مَّرْصُوْص کے تناظر میں ایک بیان میں کہا ہے کہ قوم اپنی افواج کے ساتھ سیسہ پلائی دیوار کی طرح کھڑی ہے۔ دشمن کو ہر محاذ پر منہ توڑ جواب دیا جائے گا۔
ندیم افضل چن نے کہا ہے کہ پاکستان کی خودمختاری اور قومی سلامتی پر کوئی سمجھوتا نہیں کیا جائے گا۔ ان کا کہنا تھا کہ افواجِ پاکستان نے پیشہ ورانہ مہارت، جرأت اور بہادری سے دشمن کے ناپاک عزائم کو خاک میں ملا دیا ہے۔
انہوں نے کہا کہ بھارت کا جنگی جنون خطے کے امن کے لیے سب سے بڑا خطرہ بن چکا ہے۔
“پاکستان ایک پُرامن اور ذمہ دار ملک ہے، مگر جب قومی سلامتی کی بات ہو تو ہم کوئی رعایت نہیں برتیں گے-
مرکزی سیکرٹری اطلاعات نے عالمی برادری اور اقوام متحدہ سے مطالبہ کیا کہ وہ بھارتی جارحیت اور خلاف ورزیوں کا سخت نوٹس لیں۔
ان کا کہنا تھا کہ “آپریشن بُنْيَانٌ مَّرْصُوْص قوم کے اتحاد اور افواجِ پاکستان کی صلاحیتوں کا منہ بولتا ثبوت ہے۔ قوم کو اپنی فوج پر فخر ہے، اور دشمن کو جواب دینا وقت کی ضرورت تھی۔
