گورنر بلوچستان شیخ جعفر خان مندوخیل کی اسپیکر قومی اسمبلی سردار ایاز صادق سے ملاقات
اسلام آباد، (سٹاف رپورٹر)گورنر بلوچستان شیخ جعفر خان مندوخیل نے آج پارلیمنٹ ہاؤس اسلام آباد میں اسپیکر قومی اسمبلی سردار ایاز صادق سے ملاقات کی۔ ملاقات میں وفاقی و صوبائی روابط، بلوچستان میں جاری ترقیاتی منصوبے، امن و امان کی صورتحال، اور پارلیمانی تعاون سمیت باہمی دلچسپی کے امور پر تفصیلی گفتگو ہوئی۔
اسپیکر قومی اسمبلی سردار ایاز صادق نے کہا کہ بلوچستان کی ترقی وفاق کی اولین ترجیح ہے، اور پارلیمنٹ صوبے کے عوام کے حقوق کے تحفظ میں اپنا مؤثر کردار ادا کرتی رہے گی۔ انہوں نے بلوچستان میں بھارتی پشت پناہی میں ہونے والی دہشتگرد کارروائیوں کی سخت الفاظ میں مذمت کی اور کہا کہ “فتنہ الہندوستان کے دہشتگرد بلوچستان میں بدامنی پھیلا رہے ہیں اور اس چیلنج سے نمٹنے کے لیے تمام وسائل بروئے کار لائے جائیں گے۔اسپیکر نے کہا کہ بھارتی سپانسرڈ دہشتگردی کا مقابلہ کرنے کے لیے پوری قوم متحد ہے اور ریاستی ادارے مربوط حکمت عملی کے تحت کارروائیاں کر رہے ہیں۔
گورنر بلوچستان نے اسپیکر قومی اسمبلی کو صوبے میں جاری ترقیاتی منصوبوں اور امن و امان کی صورتحال پر تفصیلی بریفنگ دی۔ انہوں نے کہا کہ وفاق اور بلوچستان حکومت کے درمیان مضبوط روابط صوبے کی پائیدار ترقی کے لیے ناگزیر ہیں۔ انہوں نے وفاق کی جانب سے بلوچستان میں جاری ترقیاتی اقدامات کو خوش آئند قرار دیا۔ملاقات کے دوران دونوں رہنماؤں نے نوجوانوں کو تعلیم، صحت، اور روزگار کے مواقع فراہم کرنے کی ضرورت پر زور دیا۔دونوں رہنماؤں کا بین الصوبائی ہم آہنگی کے فروغ اور وفاقی اداروں میں بلوچستان کی مؤثر نمائندگی پر بھی اتفاق کیا گیا۔اسپیکر قومی اسمبلی سردار ایاز صادق نے بلوچستان کے مسائل کے حل کے لیے ہر ممکن تعاون کی یقین دہانی کرائی۔
گورنر بلوچستان شیخ جعفر خان مندوخیل نے ایوان میں اسپیکر سردار ایاز صادق کے غیر جانبدارانہ کردار اور پارلیمانی کارروائی کو خوش اسلوبی سے چلانے پر ان کی قیادت کو سراہا۔
