گورنر خیبرپختونخوا فیصل کریم کنڈی اور ندیم افضل چن کی ملاقات، ملکی سیاسی صورتحال اور عوامی مسائل پر گفتگو
اسلام آباد: گورنر خیبرپختونخوا فیصل کریم کنڈی سے پاکستان پیپلز پارٹی کے مرکزی سیکرٹری اطلاعات ندیم افضل چن نے ملاقات کی۔ ملاقات میں ملکی سیاسی صورتحال، جمہوری اداروں کے استحکام اور عوامی مسائل کے حل کے حوالے سے تفصیلی بات چیت کی گئی۔اس موقع پر گورنر فیصل کریم کنڈی نے کہا کہ پاکستان پیپلز پارٹی نے ہمیشہ آئین و جمہوریت کی بالادستی کے لیے قربانیاں دی ہیں اور آج بھی پارٹی اسی مشن پر قائم ہے۔ انہوں نے کہا کہ جمہوری اداروں کی مضبوطی ہی ملک کو درپیش مسائل کا مستقل حل ہے۔ملاقات میں حالیہ سیلابی صورتحال پر بھی گفتگو ہوئی۔ دونوں رہنماؤں نے اس بات پر زور دیا کہ موجودہ حالات میں سیاست کو پس پشت ڈال کر عوامی مفاد کو ترجیح دینا وقت کی اہم ترین ضرورت ہے۔ فیصل کریم کنڈی نے کہا کہ متاثرین کی بحالی اور مشکلات کے ازالے کے لیے تمام اداروں اور سیاسی جماعتوں کو مشترکہ لائحہ عمل اپنانا ہوگا۔دونوں رہنماؤں نے اس عزم کا اعادہ کیا کہ پیپلز پارٹی عوامی خدمت، جمہوریت کے استحکام اور ملک میں اتفاق و اتحاد کے فروغ کے لیے اپنا کردار ادا کرتی رہے گی۔
