اسپیکر قومی اسمبلی سردار ایاز صادق کا اورکزئی آپریشن پر سیکیورٹی فورسز کو خراجِ تحسین، 19 دہشتگرد ہلاک، 11 جوانوں کی قربانیوں کو سلام
اسلام آباد (اداریہ نیوز) قومی اسمبلی کے اسپیکر سردار ایاز صادق نے ضلع اورکزئی میں سیکیورٹی فورسز کے آپریشن کے دوران 19 فتنہ الخوارج کے دہشتگردوں کو جہنم واصل کرنے پر پاک فوج اور سیکیورٹی اداروں کو زبردست خراجِ تحسین پیش کیا ہے۔
اسپیکر ایاز صادق نے آپریشن میں شہید ہونے والے لیفٹیننٹ کرنل جنید عارف، میجر طیب راحت سمیت گیارہ بہادر جوانوں کو دلی خراجِ عقیدت پیش کرتے ہوئے کہا کہ لیفٹیننٹ کرنل جنید عارف نے لیڈنگ فرام فرنٹ کی عظیم مثال قائم کی، جو پاک فوج کی شاندار روایت ہے۔
انہوں نے کہا کہ پاک افواج اور سیکیورٹی فورسز فتنہ الخوارج کے مکمل خاتمے کے لیے پرعزم ہیں۔ دہشتگردی کے خلاف جنگ میں پاک فوج کی قربانیاں رائیگاں نہیں جائیں گی۔ اسپیکر نے کہا کہ دہشتگرد عناصر کبھی اپنے مذموم عزائم میں کامیاب نہیں ہوں گے۔
سردار ایاز صادق نے شہداء کے اہلِ خانہ سے دلی تعزیت اور مکمل یکجہتی کا اظہار کرتے ہوئے دعا کی کہ “اللہ تعالیٰ شہداء کے درجات بلند فرمائے اور لواحقین کو صبرِ جمیل عطا کرے۔”
انہوں نے کہا کہ سیکیورٹی فورسز نے دہشتگردی کے خلاف جنگ میں لازوال قربانیاں پیش کی ہیں، اور پوری قوم پاک افواج کی قربانیوں کو سلام پیش کرتی ہے۔
