سری لنکا اے سے شکست کے بعد بھارتی کھلاڑی اور سری لنکن کھلاڑی کے درمیان تلخ کلامی
دمبولا: سری لنکا اے کے خلاف میچ میں شکست کے بعد بھارت اے ٹیم کے ایک کھلاڑی اور میزبان ٹیم کے کھلاڑی کے درمیان گراؤنڈ میں تلخ جملوں کا تبادلہ دیکھنے میں آیا۔میچ کے دوران بھارتی بیٹر سوریا ونشی اور سری لنکن کھلاڑی وشین ہالامباگے کے درمیان اس وقت کشیدگی پیدا ہوئی جب دونوں کھلاڑی ایک دوسرے کے قریب آئے۔ سوشل میڈیا پر وائرل ہونے والی ویڈیو میں دیکھا جا سکتا ہے کہ سوریا ونشی نے مبینہ طور پر ہالامباگے کو دھکا دیا، جس پر سری لنکن کھلاڑی نے بھی ردعمل ظاہر کرتے ہوئے خود کو پیچھے کیا اور صورتحال کچھ لمحوں کے لیے کشیدہ ہو گئی۔واقعے کے بعد دونوں ٹیموں کے دیگر کھلاڑی اور آفیشلز فوری طور پر درمیان میں آئے اور معاملے کو مزید بڑھنے سے روک دیا۔ خوش قسمتی سے جھگڑا سنگین شکل اختیار نہیں کر سکا اور حالات جلد معمول پر آ گئے۔سری لنکا اے نے اس مقابلے میں بھارت اے کو شکست دے کر اہم کامیابی حاصل کی، جبکہ میچ کے بعد پیش آنے والے اس واقعے کی ویڈیو سوشل میڈیا پر تیزی سے وائرل ہو رہی ہے۔ تاہم دونوں ٹیموں کی جانب سے واقعے پر تاحال کوئی باضابطہ بیان جاری نہیں کیا گیا۔کرکٹ ماہرین کا کہنا ہے کہ سخت مقابلوں میں جذبات کا بڑھ جانا غیر معمولی بات نہیں، تاہم کھلاڑیوں سے توقع کی جاتی ہے کہ وہ کھیل کے جذبے اور اسپورٹس مین شپ کو ہر حال میں مقدم رکھیں۔
